ജനാവകാശ സംരക്ഷണ സമിതിയുടെ തുറമുഖ കവാടത്തിൽ റാലിയും പ്രതിഷേധ ധർണ്ണയും നടത്തി

04.04.2026

അയൂബ് ഖാൻ

വിഴിഞ്ഞം : പുളിങ്കുടി ജനാവകാശ സംരക്ഷണ സമിതിയുടെ നേതൃത്വത്തിൽ തുറമുഖ കവാടത്തിൽ മഹാറാലിയും പ്രതിഷേധ ധർണ്ണയും സംഘടിപ്പിച്ചു. വൈകുന്നേരം നാലിന് പുളിങ്കുടിയിൽ നിന്ന് വിഴിഞ്ഞം അന്താരാഷ്ട്ര തുറമുഖ കവാടത്തിലേക്ക് നടന്ന മാർച്ചിൽ പരിസ്ഥിതി പ്രവർത്തകർ, മത്സ്യ തൊഴിലാളികൾ, ടൂറിസം മേഖലയിലെ ഓട്ടോ-ടാക്സി തൊഴിലാളികൾ ,ബീച്ചിലെ ചെറുകിട വ്യാപാരികൾ ഉൾപ്പെടെ നിരവധി പേർ പങ്കെടുത്തു. തുറമുഖത്തിന്റെ അടുത്തഘട്ട നിർമ്മാണ പ്രവർത്തനങ്ങളുടെ ഫലമായി ഉണ്ടായ തീരശോഷണവും അതുവഴി ഉണ്ടാകുന്ന തൊഴിൽ ഇല്ലായ്മയും, പരിസ്ഥിതി മലിനീകരണമടക്കമുള്ള പ്രശ്‌നങ്ങളും ഉന്നയിച്ചാണ് പ്രതിഷേധ മാർച്ചും ധർണ്ണയും സംഘടിപ്പിച്ചത് . ധർണ്ണ കേരള ഹോട്ടൽസ് ആൻ്റ് റെസ്റ്റോറൻ്റ് അസോസിയേഷൻ രക്ഷാധികാരി സുധീഷ് കുമാർ ഉദ്ഘാടനം ചെയ്തു. സമിതി പ്രസിഡന്റ് ജെറോം ദാസ് അധ്യക്ഷത വഹിച്ചു. സെക്രട്ടറി. എ. കെ.ഹരികുമാർ ആമുഖ പ്രസംഗം നടത്തി. സുവനീർ ഷോപ്പുകളുടെ പ്രതിനിധി രാജ മുഖ്യ പ്രഭാഷണം നടത്തി. ടാക്സി-ഓട്ടോ തൊഴിലാളികളെ പ്രതിനിധീകരിച്ച് അഭിലാഷ് എസ്. വി , അതിയന്നൂർ ബ്ലോക്ക് പഞ്ചായത്ത് വൈസ് പ്രസിഡന്റ് കെ. എസ്. രാജൻ, കോട്ടുകാൽ പഞ്ചായത്തംഗം ഹൈസന്ത് ലൂയിസ് എന്നിവർ പങ്കെടുത്തു.